Love Actually (títol orichinal en anglés, en aragonés Realment amor, enguerada en Aragón con o suyo títol orichinal) ye una cinta de cine de comedia romantica de l'anyo 2003 de coproducción anglo-franco-estausunidense dirichida por Richard Curtis seguntes un guión orichinal d'él mesmo, con una banda sonora orichinal de Craig Armstrong, una dirección de fotografía de Michael Coulter y una producción cinematografica de Duncan Kenworthy, Tim Bevan, Eric Fellner, Debra Hayward y Liza Chasin ta las productoras StudioCanal, Working Title Films y DNA Films. L'elenco d'actors ye formau, entre d'atros, por Hugh Grant, Liam Neeson, Colin Firth, Laura Linney, Emma Thompson, Alan Rickman, Keira Knightley, Martine McCutcheon, Bill Nighy y Rowan Atkinson.
Love Actually conta las historias cruzadas d'una decena de parellas mientres as cinco semanas previas a las fiestas de Navidat, amostrando en todas ellas cómo l'amor consigue trunfar perén con tot y con ixo. A historia se desembolica en epoca actual d'a cinta (2003) mas que mas en Londres (Reino Uniu), pero tamién en Marsiella (Francia), Lisbona (Portugal) y Milwaukee (Wisconsin, Estaus Unius), y lo suyo rodache s'escaició en Londres y en os Estudios Shepperton en Surrey (Reino Uniu) y Vidauban (Var), Ais de Provença y Marsiella (Bocas d'o Roine) en Francia;[2] una escena rodada en Kenya finalment no fue incluyida en o montache final. Se tracta d'una cinta con cuantos premios y nominacions recibius, podendo-se destacar un Premio BAFTA a lo Millor Actor Segundario ta Bill Nighy en a suya 57ena edición, amás de dos nominacions, y dos nominacions a los Premios Globos d'Oro en a suya 61ena edición.
© MMXXIII Rich X Search. We shall prevail. All rights reserved. Rich X Search